Шаноўныя калегі, радыя нагадаць, што 2-8 жніўня 2010 г. Інстытут гістарычных даследаванняў Беларусі і дэпартамент філасофіі Еўрапейскага гуманітарнага універсітэта ладзяць міжнародную летнюю школу для маладых даследчыкаў і выкладчыкаў у сферы гуманітарных і сацыяльных навук. Летняя школа адбудзецца ў сядзібе "Kernavės bajorynė" (30 км ад Вільнюса).

Пытанне пра генезіс, лёс і шляхі нацыябудаўніцва ў Беларусі актуалізавалася пасля распаду СССР. Сучасныя даследчыкі дадзенага пытання зыходзяць з таго, што разгляд сітуацыі ў Беларусі наўрад ці можа быць прадуктыўным без звароту да палітычных, сацыяльных і культурных працэсаў у Еўропе і Еўразвязе да і пасля 1989 года. Такая ўстаноўка абумоўлена не толькі ўласнай нацыянальна-культурнай традыцыяй Беларусі, але і тым фактам, што менавіта ў еўрапейскай прасторы стала відавочнай сувязь нацыянальнага самавызначэння з працэсамі эмансіпацыі і дэмакратызацыі, якія прадугледжваюць таксама крытычнае асэнсаванне перашкодаў на гэтым шляху.

У межах летняй школы будуць прадстаўленыя асноўныя гістарычныя і сацыяльна-тэарэтычныя падыходы ў аналізе праблематыкі беларускага нацыябудаўніцтва ў еўрапейскім кантэксце. Гістарычныя экскурсы ў спецыфіку нацыянальных працэсаў у Беларусі будуць суправаджацца аналізам працэсаў глабалізацыі і пошуку новых каштоўнасных арыенціраў у сучаснай Еўропе.

Праграма школы ўключае наступныя тэмы:

• Беларускае нацыябудаўніцтва і ідэя Еўропы
• Праблема генезісу нацыябудаўніцтва і сучасныя тэорыі нацыябудаўніцтва
• Беларуская ідэнтычнасць: гісторыя і памяць
• Беларусь у пошуках нацыянальнай ідэі: этнакультурны, грамадзянскі, касмапалітычны нацыяналізмы
• Шляхі нацыябудаўніцтва ў Беларусі: роля гарадской і вясковай сацыяльных групаў
• Нацыяналізм, еўрапеізацыя, дэмакратызацыя.

Школа мае міждысцыплінарны характар.

Запланаваны ўдзел такіх вядомых даследчыкаў праблематыкі беларускага нацыябудаўніцтва, як Алег Латышонак і Яўген Мірановіч з Беластоку, Валянцін Акудовіч, Ігар Бабкоў, Валеры Булгакаў, Захар Шыбека з Мінску, Сяргей Токць (Гродна) ды інш.

Плануецца таксама запрашэнне навукоўцаў з Нямеччыны і Літвы.

Па кожным з тэматычных накірункаў плануюцца выступы 2-3 запрошаных экспертаў і сумесная дыскусія. У межах дыскусій ад удзельнікаў школы чакаюцца сціслыя выступы (да 10 хвілінаў).

Адбор удзельнікаў школы будзе праводзіцца на конкурснай аснове. Галоўным крытэрам з’яўляецца навуковая зацікаўленасць у беларускай праблематыцы, а таксама выкарыстанне атрыманых ведаў у выкладчыцкай або грамадскай дзейнасці.

Да ўдзелу ў конкурсе запрашаюцца маладыя навукоўцы і выкладчыкі з Беларусі ды іншых краінаў. Мінімальнае патрабаванне да ўдзелу - навучанне ў магістратуры або ступень магістра (ці дыплом аб вышэйшай адукацыі) у галіне сацыяльных ці гуманітарных навук, а таксама прафесійная (акадэмічная, грамадская) дзейнасць, звязаная з тэматыкай школы. Узрост удзельнікаў да - 35 гадоў.

Працоўныя мовы – беларуская і руская.

Больш падрабязную інфармацыю глядзіце па спасылцы далей.