Я шмат разоў чуў ад сяброў, што жывуць у дэмакратычных краінах: "Дэмакратыя – гэта нуда. У вас (у сэнсе, у РБ), не гледзячы ні на што, весялей".

Сапраўды, пры дэмакратыі палітык увесь час знаходзіцца пад кантролем – канкурэнцыя, СМІ, грамадская думка... У выніку заходнія лідары, якія моляцца на сацыялагічныя даследаванні, выглядаюць прэсна і нецікава. І няма чаго дзівіцца, калі іх задача - заданне увесь час падабацца большасці. Прычым не ўяўнай, а цалкам канкрэтнай – у колькасці 51-го працэнту выбаршчыкаў.

Адпаведна, якое натхненне можа атрымаць творца ад сустрэчы з такім вось сацыялагічна-вытанчаным кібаргам? Іншая справа - усходні "стронгмэн", які трымае ў страху ўсю краіну. Гэта куды больш прыцягальна. Кроў і плоць, сіла, самаўпэўненасць, арыгінальнасць... Да ўсяго - адчуванне, што ўваходзіш у клетку да тыгра.

Спіс інтэлектуалаў, якія захапляліся таталітарызмам, вялікі. Яны заляцаліся да Сталіна і Гітлера, да Мао і Кастра. Колькі паважаных людзей можна пабачыць на здымках у таварыстве гэтых істотаў…

Аўтарытарызм, а раней таталітарызм, заўсёды быў прывабнай альтэрнатывай заходняй дэмакратычнай нудзе. Калі, зразумела, параўноўваць гэтыя рэчы, седзячы з капучына ва ўтульным кафэ, скажам, у Парыжы ці любым іншым Лондане.

Таму, напрыклад, Олівер Стоўн захапляецца Кастра. Нават фільм пра старога Фідэля зняў. А іншы знакаміты рэжысёр нядаўна прыляцеў у Мінск сваім уласным самалётам - каб наведаць нашага славянскага віцязя.

Зразумела, зусім інакш выглядае справа, калі ты глядзіш на аўтарытарызм не звонку, а знутры і на ўласнай скуры адчуваеш усю хвалёную незалежнасць самі-ведаеце-каго.

Punkt widzenie zależy od punktu siedzenia, і гусь свінні не таварыш. Эмпатыя не заўсёды ўласцівая творцам. Іх захапляе не толькі дабро, але і зло. Так было, так ёсць і так будзе.

Аднак у гэтай сумнай справе можа знайсціся месца і для пазітыву. Імаверна, што тата самага вядомага хлопчыка ў краіне ў выніку менавіта пасля гэтага візіту "далучыўся" да вялікага мастацтва.

- Я не глядзеў, мне раздрукоўку далі, – сказаў Аляксандр Рыгоравіч надоечы пра відэазварот расейскага прэзідэнта.

Будзем спадзявацца, цяпер Кустурыцу Рыгоравіч не па раздрукоўках ведае.

Крыніца: poczobut.livejournal.com

Тэкст прайшоў рэдагаванне сайту Belintellectuals.eu. Аўтарская назва: "SOME як вядома LIKE IT HOT".